​ភ្នំពេញ​៖ ពាក្យ​ថា កក្កដា មក ពី​ភាសាបាលី និង​ភាសាសំស្ក្រឹត​ថា  កក្កដ (​កៈ​-​កៈ​-​ដៈ​) ប្រែជា​ខេមរភាសា​ថា សត្វ​ក្តាម ។ កក្កដា ជា​ខែ​ទី​៤ នៃ សុរិយគតិ ប៉ុន្តែ​វា​ជា​ខែ​ទី​៧ នៃ​ប្រតិទិន​សកល​ហើយ​វា​ជា​ខែ​មួយ​ក្នុងចំណោម ខែ​ទាំង​ប្រាំពីរ ដែល​ក្នុង​មួយខែ​មាន រយៈពេល​៣១​ថ្ងៃ ។ គេ​អាច​ហៅ​ខែ កក្កដា ថា កក្កដ​រាសី​ក៏បាន ។​
    
​កក្កដា ត្រូវបាន​ផ្តល់កំណើត ឱ្យនៅ​៧៥៣​ឆ្នាំមុន​គ្រិស្តសករាជ តាម រយៈ​ប្រតិទិន រ៉ូ​មូ​លូ​ស (Romulus calendar) ដែល​ប្រតិទិន​នេះ ក្នុង​មួយឆ្នាំ មានតែ​១០​ខែ​ប៉ុណ្ណោះ ដោយ​ចាប់ផ្តើម ពី​ខែមីនា ។ ដោយហេតុនេះ កាល ណោះ​កក្កដា ជា​ខែ​ទី​៥ ហើយ​មាន ឈ្មោះ​ជា​ភាសាឡាតាំង​ថា Quintilis ដែល​មានន័យថា ទី​៥ ។  ដូច្នេះ​មក ដល់​ឆ្នាំ​២០១៦​នេះ ខែកក្កដា មាន អាយុកាល​២.៧៦៩​ឆ្នាំ​ហើយ ។​
    
 ឆ្នាំ​ទី​៧១៣ មុន​គ្រិស្តសករាជ ព្រះ​ចៅ​នូ​ម៉ា ប៉ុ​ម​ពី​លី​យើ​ស (Numa Pompilius) ជា​ក្សត្រ​ទី​២ ក្នុងចំណោម ក្សត្រ​តាម​បវេណី​ទាំង​ប្រាំពីរ​អង្គ​របស់ ទីក្រុង​រ៉ូម បាន​កែប្រែ​ប្រតិទិន​រ៉ូ​មូ​លូ​ស ឱ្យទៅជា​ប្រតិទិន នូ​ម៉ា (Calendar of Numa) ។ ប្រតិទិន​នេះ​ក្នុង​មួយ​ឆ្នាំមាន ១២​ខែ ហើយ​ខែកក្កដា ក៏បាន​ក្លាយ ទៅជា​ខែ​ទី​៧ តាំងពី​ពេលនោះ ។​
    
​ប្រតិទិន​នូ​ម៉ា​នេះ ត្រូវបាន កែប្រែ​ឱ្យទៅជា​ប្រតិទិន​ជូ​លាន (Julian calendar) ដោយ​លោក​ជូ​លី​យើ​ស​-​សេ​ហ្សា (Julius Caesar) នៅ​៤៦​ឆ្នាំ មុន គ្រិស្តសករាជ ។ ដើម្បី​ជាការ​ដឹងគុណ ដល់​លោក​ជូ​លី​យើ​ស​សេ​ហ្សា ដែល​បាន បង្កើត​ប្រតិទិន​ថ្មី​នេះ សភា​រ៉ូ​ម៉ាំង បាន​កែ ប្រែ​ឈ្មោះ​ខែ​ទី​៧ គឺ​ខែ Quintilis ដាក់​ទៅជា Julius វិញ ។ ខែកក្កដា ដែលជា ភាសា​អង់គ្លេស​ហៅថា July គឺ​មកពី ភាសាឡាតាំង ដែលជា​ឈ្មោះ​ដើម​ថា Julius  នេះឯង ។​
    
 លុះដល់​ឆ្នាំ​១៥៨២ នៃ​គ្រិស្ត សករាជ ក៏ត្រូវ​បាន​សម្តេច​ប៉ាប​ហ្គ្រេ​ហ្កូ​រី ទី​១៣ (Pope Gregory XIII) កែប្រែ ប្រតិទិន​ជូ​លាន​នេះ​ឱ្យទៅជា​ប្រតិទិន ហ្ក្រេ​ហ្កូ​រាន (Gregorian calendar) ដែលជា​ប្រតិទិន​សកល​នាពេល​បច្ចុប្បន្ន ។​
    
​ទំនាយ​ខែកក្កដា​
 តាម​ក្បួន​ហោរា​នៃ​ពួក​បស្ចិម លោក បុគ្គល​ដែល​ចាត់ទុកថា កើត​នៅក្នុង​ខែកក្កដា គឺ​ជនានុជន​ទាំងឡាយណា កើត​នៅក្នុង​ចន្លោះ​ថ្ងៃទី​២១ ខែមិថុនា​-​ថ្ងៃទី​២២ ខែកក្កដា ហើយ​មនុស្ស​ទាំងនេះ​គេ​អាច​ហៅថា កក្កដ​រាសី​បុគ្គល​ក៏បាន ។ កក្កដ​រាសី​បុគ្គល​ស្មើនឹង​មនុស្ស កើត​ឆ្នាំមមែ នៃ​ក្បួន​ហោរា​ចិន ។​
    
​កក្កដ​រាសី​បុគ្គល ធាតុទឹក ទទួល​ឥទ្ធិពល​ពី​ភព​ព្រះ​ចន្ទ (Moon)  ជា​ប្រភេទ​មនុស្ស​ចូលចិត្ត​ប្រើ​អារម្មណ៍ មាន​មនោ​ស​ញ្ចោ​ត​នា ។ ត្បូង​នាំ​សំណាង គឺ​ត្បូង​ដួង​ចន្ទ (Moonstone) គជ់ (Pearl) ត្បូង​ទទឹម (Garnet) និង​ត្បូងថ្ម​យក់ស ឬ​ថ្លើមថ្ម​ស (White jade) ។ អ្នក​កើត​ក្នុង​កក្កដ​រាសី ឆុង​នឹង​អ្នក​កើត​ខែកុម្ភៈ ។​
    
 កក្កដ​រាសី​បុគ្គល គឺជា​មនុស្ស​ពូកែ​ដា​ក់មនោស​ញ្ចោ​ត​នា​ជ្រាលជ្រៅ ។ គ្រួសារ​គឺជា​កត្តា​សំខាន់​ទីមួយ​សម្រាប់ ចិត្ត​របស់​មនុស្ស​កើត​ខែកក្កដា ។ មនុស្ស នេះ​តែងមាន​ចិត្ត​សន្តោស​ប្រណី និង អធ្យាស្រ័យ​ខ្ពស់​ចំពោះ​មនុស្ស ដែល​នៅក្បែរ​ខ្លួន មាន​មេត្តាធម៌ មាន​មនោ​ស​ញ្ចោ​ត​នា​ជ្រាលជ្រៅ​ការពារ​មនុស្ស​ជាទី​ស្រឡាញ់​ដល់ទី​បំផុត ដូច្នេះ​គេ ស័ក្តិ​សមជា​ឪពុក ឬ​ម្តាយ​បំផុត ។ នៅ ពេល​មាន​ជម្លោះ​ក្នុង​គ្រួសារ​បុគ្គល​នេះ មិនដែល​យក​ជម្លោះ​នោះមក​ដាក់​ក្នុង​ចិត្ត ហើយ​គិត​ចង់​សងសឹក​ឡើយ ថែម ទាំង​ចេញមុខ​ការពារ​គ្រួសារ​ទៀតផង​។​
    
​ប៉ុន្តែ​បុគ្គល​នេះ ក៏មាន​ចំណុច ខ្សោយ​គួរឱ្យ​រកាំចិត្ត​ណាស់ដែរ គឺ​ចូលចិត្ត​ធ្វើ​ត្រាប់​តាម​អ្នកដទៃ ហើយ​បង្ហាញ​ឱ្យ​អ្នកផ្សេង​យល់ថា នោះ​ជា​របៀប​របស់​ខ្លួនគេ​ចូលចិត្ត​រំលឹក​រឿង​អតីតកាល​បង្កជម្លោះ​ដោយ ប្រយោល ឬ​ហៅ​ម្យ៉ាង​ទៀតថា ចាក់រុក​ឱ្យ​អ្នកដទៃ​ឈ្លោះ​គ្នា ចូលចិត្ត​រំខាន​អ្នកដទៃ និង​ចូលចិត្ត​ធ្វើខ្លួន​ជា​អ្នកគ្រប់គ្រង​ត្រួតត្រា​គេ ។​
    
 បុគ្គល​កើត​ក្នុង​កក្កដា តែង បង្ហាញ​ពី​អារម្មណ៍​ស្រឡាញ់​ភ្លាមៗ ដោយ​មិន​ខ្វល់​ត្រិះរិះ​ពិចារណា​ឡើយ ។ បុគ្គល​កើត​ក្នុង​កក្កដ​រាសី មិន​ចូលចិត្ត ឡើយ​នូវ​មនុស្ស​ដែល​ពូកែ​អួត​ក្អេងក្អាង​ឬ​វាយឫក​ពេក ។ បុគ្គល​កើត​ក្នុង កក្កដ​រាសី គឺជា​គូស្នេហ៍​ដែល​ចេះ​លះបង់ ចំពោះ​អ្នក​ដែល​ខ្លួន​ស្រឡាញ់​បំផុត ។​
          
​ទោះ​មាន ចរិតមិនល្អ​ខ្លះ​ដូច ពោល​ខាងលើ​មកហើយ​ក្តី បុគ្គល​កើត ក្នុង​កក្កដ​រាសី​គឺជា​មិត្តភក្តិ​ដែល​ចេះ​ជួយ អ្នកដទៃ​ខ្លាំងណាស់​។ បុគ្គល​នេះ​ចាត់ ទុក​មិត្តភក្តិ​គឺជា​របស់​មានតម្លៃ​បំផុត ទី​ពីរ​បន្ទាប់ពី​គ្រួសារ​របស់ខ្លួន ។​
           
​តាម​ធម្មតា បុគ្គល​នេះ​មិនសូវ ចេះ​រើសអើង​ចំពោះ​ការងារ​ឡើយ ពោលគឺ​តែង​ចាប់យក​ឱកាស​ធ្វើ ការងារ​គ្រប់​ប្រភេទ​ឱ្យតែ​គេ​មាន  ឱកាស ។ ប៉ុន្តែ​ការងារ​ដែល​បុគ្គល នេះ​អាច​រីកចម្រើន​និង​ត្រចះត្រចង់​បាន គឺ​មានតែ​ប្រភេទ​ការងារ​ដែល​ពាក់ព័ន្ធ នឹង​ការមើល​ថែទាំ​ប៉ុណ្ណោះ​ជាពិសេស បើជា​នារី​វិញ​ការងារ​គិលានុបដ្ឋាយិកា គឺ​ល្អ​បំផុត​ហើយ ។ ទោះយ៉ាងណា ការងារ​ជា​អ្នកសារព័ត៌មាន​ក៏​សមគួរ ដល់​បុគ្គល​នេះដែរ​ហើយ​បើជា​បុរស វិញ​ការងារ​ជា​អ្នកនយោបាយ​ក៏​ស័ក្តិសម ណាស់ដែរ ។​
      
​កក្កដ​រាសី បុគ្គល​ប្រសប់​រកលុយ ខ្លាំងណាស់​ហើយ​ចាយវាយ​ត្បិតត្បៀត ក៏​ណាស់ដែរ​ប្រសិនបើ​បុគ្គល​នេះ​គិត ចង់​យកលុយ​វិនិយោគ​វិញ​ក៏​គេ​មិន វិនិយោគ​ច្រើន​ដែរ ។​
          
​ព្រឹត្តិការណ៍​ជាតិ​សំខាន់ៗ​
          
 ថ្ងៃទី​១០​ខែកក្កដា​ឆ្នាំ​២០១៤ ប្រារឰ​ពិធី​គោរព​វិញ្ញាណក្ខន្ធ ព្រះករុណា ព្រះបាទ​សម្តេចព្រះ​នរោត្តម សីហនុ​ព្រះមហាវរក្សត្រ​ព្រះវររាជ បិតា​ឯករាជ្យ​បូរណភាព​ទឹកដី និង ឯកភាព​ជាតិខ្មែរ​ព្រះ​បរម​រតន​កោដ្ឋ និង​បង្សុកូល​រាប់បាត្រ​ព្រះសង្ឃ​នៅមុខ ព្រះបរមរាជវាំង ។​
          
 នៅ​ព្រឹក​ថ្ងៃទី​១១ ខែកក្កដា ឆ្នាំ ២០១៤​ព្រះ​បរម​អដ្ឋិ​នៃ​ព្រះ​បរម​រតន​កោដ្ឋ ត្រូវបាន​ដង្ហែ​ចេញពី​ព្រះបរមរាជវាំង ដោយ​ថ្មើរជើង​ចេញពី​ទ្វារ​ជ័យ​បត់​ឆ្វេង តាម​មហាវិថី​សម្តេចព្រះ​សុធារស​បត់ ឆ្វេង​តាម​វិថី​សម្តេចព្រះ​ធម្មលិខិត​អ៊ុក បត់​ឆ្វេង​តាម​មហាវិថី​ព្រះ​នរោត្តម​ព័ន្ធ ខាងលិច​វិមានឯករាជ្យ​បត់​ឆ្វេង​តាម មហាវិថី​ព្រះសីហនុ​បត់​ឆ្វេង​តាម​មហា វិថី​ព្រះ​សុធារស​និង​ចូល​ព្រះ​ឧបោសថ រតនា​រាម​តាម​ទ្វារធំ​ខាងកើត​។ ថ្ងៃទី​១ ២​ខែ​ឆ្នាំ​ដដែល​បញ្ចុះ​ព្រះ​បរម​អដ្ឋិ​នៅ ក្នុង​ចេតិយ​នៅក្នុង​បរិវេណ​ព្រះវិហារ ព្រះ​កែវ​មរកត ។​
          
 ព្រះរាជ​ពិធី​ដង្ហែ​នេះ​មាន​ក្បួន ហែ​ចំនួន​បួន​ផែន​ដែលមាន​សមាជិក សរុប​៤.០០០​នាក់​គឺ​ផែនទី​១. ផែន​ជ័យ បង្ហាញ​ពី​សក្តានុពល នៃ​កម្លាំង​កងទ័ព និង យុវជន​មាន​មនុស្ស​ចំនួន​៤៩២ នាក់​។​
          
​ផែនទី​២​ផែន មន្ត្រីរាជការ តុលាការ​ស្ថាប័ន​នីតិបញ្ញត្តិ​និង​ព្រះពុទ្ធ សាសនា​មាន​មនុស្ស​៣២៦​អង្គ​និង​នាក់ (​រួមទាំង​អ្នកភ្លេង​ពិណពាទ្យ​១៣​ទៅជា ៣៣៩​រូប​) ។​
      
​ផែនទី​៣​គឺ​ផែន​មន្ត្រី​រដ្ឋាភិបាល និង​សាសនា​ព្រា​ហ្ម​មាន​មនុស្ស​២៨៩ នាក់​។ ផែនទី​៤​គឺ​ផែន​ព្រះទីនាំង​តម្កល់ ព្រះ​បរម​អដ្ឋិ​មាន​មនុស្ស​៨៥២​នាក់ (​រួមទាំង​អ្នក​កាន់​អភិរម​១៨​នាក់​) ។​
          
​ផែន​ទាំង​៤ សរុប​មាន​មនុស្ស ១.៩៧៥​នាក់ បូក​នឹង​ផែន​ថ្មើរជើង​ដែល មាននៅ​ក្នុង​ក្បួន​ចំនួន​២.២២០​នាក់ ផ្សេងទៀត​។ ក្នុង​ព្រះ​រាជពិធី​ដង្ហែ​នោះ មានការ​ចូលរួម​ពី​ព្រះសង្ឃ​ថ្នាក់ដឹកនាំ ជាន់ខ្ពស់​របស់​ជាតិ​មន្ត្រីរាជការ​មក ពី​ក្រសួង​ស្ថាប័នរដ្ឋ​សិស្ស​និស្សិត និង ប្រជាពលរដ្ឋ​គ្រប់​ស្រទាប់វណ្ណៈ ។​
          
​បណ្តាញ ផ្សព្វផ្សាយ​ជាតិ​បាន ផ្សាយ​ផ្ទាល់​និង​បន្ត​ផ្ទាល់​នូវ​ព្រះរាជ​ពិធី ដង្ហែ​នោះ ។ ប្រជាពលរដ្ឋ​ចេញមក ទស្សនា​និង​សម្តែង​ក្តី​អាឡោះអាល័យ​។ មាន​ការបាញ់​កាំជ្រួច​និង​កាំភ្លើង​ធំ​១០១ ណាត់​។ វត្ត​អារាម​នានា​មាន​រៀបចំ ពិធី​សាសនា​ដើម្បី​ឧទ្ទិស​ព្រះរាជ​កុសល ថ្វាយ​ដួង​ព្រះ​វិញ្ញាណក្ខន្ធ​របស់​ព្រះអង្គ​។​
       
 វេលា​ម៉ោង ៩:៣០​នាទី​ព្រឹក​ថ្ងៃ ទី​១៤​ខែកក្កដា​ឆ្នាំ​២០១៤ ឧទ្ធម្ភាគចក្រ យោធា​ជើង​អាកាស​មួយគ្រឿង​របស់ កម្ពុជា​បាន​ធ្លាក់​នៅពេល​កំពុង​ហ្វឹក ហាត់​នៅ​ចំណុច​ភូមិ​ព្រៃ​ទីទុយ​សង្កាត់ ព្រៃ​ស ខណ្ឌដង្កោ​រាជធានី​ភ្នំពេញ បណ្តាលឱ្យ​នាយទាហាន​បួន​នាក់​ស្លាប់ ក្នុងនោះ ឧ​ត្ត​ម​សេនីយ៍​ពីររូប​វរសេនីយ៍ ពីររូប និង​របួសធ្ងន់​ម្នាក់​។ ឧទ្ធម្ភាគចក្រ ដែល​ធ្លាក់​នោះ​ផលិត​នៅ​ប្រទេស​ចិន ម៉ាក ឍ​-9 ជា​ឧទ្ធម្ភាគចក្រ​មួយគ្រឿង ក្នុងចំណោម​ឧទ្ធម្ភាគចក្រ​ទាំង​១២ គ្រឿង​ដែល​រាជរដ្ឋាភិបាល​កម្ពុជា​ទើប តែ​ទទួល​មកពី​ប្រទេស​ចិន​ហើយ​ប្រើប្រាស់ នៅ​អង្គភាព​ហ្វឹកហ្វឺន​យោធា​ទ័ព អាកាស​៩០៤ ។​
      
​ទិវា​ជាតិ​នានា​
    
​ថ្ងៃទី​១ ទិវា​ជាតិ កាណាដា និង ទិវា​ជាតិ សុ​ម៉ាលី , ថ្ងៃទី ៤ ទិវា​ឯករាជ សហរដ្ឋអាមេរិក , ថ្ងៃទី ៧ ទិវា​ជាតិ នេ​ប៉ាល់ , ថ្ងៃទី ១១ ទិវា​ជាតិ ម៉ុង​ហ្គោ​លី , ថ្ងៃទី ១៤ ទិវា​ជាតិ បារាំង , ថ្ងៃទី ២១ ទិវា​ជាតិ បែ​ល​ស៊ិ​ក , ថ្ងៃទី ២៣ ទិវា​ជាតិ អេ​ហ្ស៊ី​ព , ថ្ងៃទី ២៨ ទិវា​ជាតិ ប៉េ​រូ , ថ្ងៃទី ៣០ ទិវា​ជាតិ ម៉ូ​រ៉ុ​កូ ៕

​